Интернет алаяқтар бұл жолы UFC спортшысы Олег Тактаров болып, жымысқы әрекетін жүзеге асырғысы келген, деп хабарлайды inbusiness.kz сайты.
Бұл туралы Алматы облысының Полиция департаменті хабарлама таратты. Онда алаяқтардың психологиялық ықпал етудің жаңа тәсілдерін жиі қолданатыны ескертілген. Алаяқтар танымал адамдардың бейнесі мен дауысын қолдан жасап, өзін банк, құқық қорғау органдары немесе арнайы қызмет өкілдері ретінде таныстыруға кіріскен.
"Осындай жағдайлардың бірі полиция қызметкерімен болды. Оның телефонына өзін Ұлттық банк қызметкері ретінде таныстырған белгісіз адамдар хабарласып, атына тіркелмеген есепшоттар бар екенін айтып, қаражатты "заңдастыру" сылтауымен аударуға көндірмек болған", – делінген хабарламада.
Полиция қызметкері сөйлесуді тоқтатып, оған күмән келтірген. Сол кезде алаяқтар қысымды күшейтіп, бейнеқоңырауға жалған арнайы қызмет өкілін қосқан. Ал оның сырт келбеті белгілі ресейлік спортшы, жекпе-жек шебері әрі актер Олег Тактаровқа қатты ұқсаған.
"Танымал адамның бейнесін қолдану жәбірленушінің сеніміне кіріп, психологиялық әсер етуге бағытталған. Десе де, полиция қызметкері алаяқтық белгілерін дер кезінде байқап, мұндай жағдайда қалай әрекет ету қажеттігін көрсетті. Жымысқы әрекеті әшкере болғанын түсінген күдіктілер әңгімені тоқтатып, қайта хабарласуды доғарған", – деді ведомство өкілдері.
Полиция мұндай алаяқтық схемалардың бүгінде кеңінен таралғанын айтып, көпшілікті барынша сақ болуға шақырады.
