Мәжіліс төрағасы Ерлан Қошанов алаяқтық схемаларды ұйымдастырушыларды ғана емес, оған ықпал ететіндерді, атап айтқанда, мобильді операторлар, қаржы ұйымдарының қызметкерлері, дропперлерді де қатаң жауапқа тартуды ұсынды, деп хабарлайды inbusiness.kz сайты.
"Соңғы уақытта цифрлық ортадағы қылмыстардың ауқымы да, одан туындайтын қауіп-қатер де едәуір артып келеді. Сондықтан сөз сөйлеген депутаттар өте орынды мәселе көтеріп отыр. Бірақ біз кінәліні ғана іздемей, мәселенің шешу жолын қарастыруымыз керек. Қазіргі кезде кибералаяқтар қоңырау шалмаған немесе күмәнді хабарлама жібермеген адам қалмаған шығар", - деді Мәжіліс спикері.
Ерлан Қошанов мұндай келеңсіз үрдіс тек Қазақстанды ғана емес, бүкіл әлемді жаулап алғанын тілге тиек етті. Ол Президенттің бұл мәселе бойынша тиісті тапсырмасы бар екенін еске салды.
"Кибершабуылдардың басым бөлігі шетелден келетіні және трансұлттық сипатта болатыны түсінікті. Бірақ бұл жерде жауапкершілік осы тізбектің барлық қатысушыларына бірдей қарастырылуы керек. Яғни, алаяқтық схемаларды ұйымдастырушылар ғана емес, оған ықпал ететіндер де қатаң жауапқа тартылуға тиіс. Ол – мобильді операторлар, қаржы ұйымдарының қызметкерлері, дропперлер және басқа да қатысушылар", - деді ол.
Мәжіліс төрағасы кибералаяқтықпен күресті күшейтіп, қылмыстық жауапкершілікті барынша қатаңдату керек екенін айтты.
