Алдағы 3-5 күнде елімізде ауа райы жауын-шашынды болады. Бұл туралы "Қазгидромет" ұзақмерзімді ауа болжамы басқармасының басшысы Жұлдыз Исабекова Астанада өткен баспасөз мәслихатында айтты, деп хабарлайды inbusiness.kz сайты.
"Алдағы 3-5 күнде Қазақстанда ауа райы жауын-шашынды болады. Түнде солтүстік, орталық, шығыста қар аралас жаңбыр жаууы мүмкін. Оңтүстік өңірлерде жаңбыр жауады. Жалпы 15 наурыздан бастап Қазақстанның басым бөлігінде жауын-шашын мөлшері нормадан көп және норма шамасында болады деген болжам жасалған. Осы болжам әлі сақталады. Себебі сәуірдің екінші онкүндігінің 5 күнінде еліміздің басым бөлігінде жауын-шашын жауады", - деді спикер.
Бұдан бөлек алдағы 3 күнде батыста, оңтүстік-батыста, оңтүстікте ауа температурасы түнде 5-10 градусқа дейін жоғарыласа, күндіз 15-25 градусқа дейін ауытқиды деп күтіліп отыр.
"Солтүстік, орталық, шығыс өңірлерде түнде 0-5 аяздан, плюс 3-8 градусқа дейін, күндіз +3-8 градустан плюс 10-15 градусқа дейін көтеріледі. 15-20 сәуір аралығында ауа температурасы елдің басым бөлігінде біртіндеп жоғарылайды. Атап айтқанда, күндіз 20-28 градусқа дейін көтеріледі", - деп жалғастырды Жұлдыз Исабекова.
Осы тұста бұл ауа райы болжамы 10 сәуірден 20 сәуірге дейінгі аралықты қамтитынын атап өту керек.
