Күйеуі көптен жұмыс істемейді екен. Тек тозығы жеткен "Москвич" көлігімен аудан орталығына оқта-текте жолаушы тасып, жанұясының ас-ауқатын түгендейді. Ал, отанасы болса үй шаруасында. Үйдің үлкені 14 жаста, кішісі 4-ке толған. Бала-шағаның жыртығын жамауға шамасы келмей отырған отбасы жуырда атаулы әлеуметтік көмекке қол жеткізіп, азық-түлігін алып, қораға мал да байлапты.
"Мемлекет тарапынан берілген атаулы әлеуметтік көмекке қол жеткізгенімізге дән ризамыз. Соның арқасында бала-шағаның мектепке барар киімін әпердім. 4 балам білім ошағында оқиды. Олардың киімін түгендеу де оңай емес. Жанұядағы жоқ-жітікті де түгендеп алдық. Одан артылғанына міне бір өгіз, бір жылқы алып отырмын. Осыларды бордақылап, етке өткізсем деген үмітім бар. Сөйтіп, қаражатты біршама айналдыруды көздеп отырмын", – дейді ол.
Нұргүл Базарбай бұған дейін айына 10 мың теңге көлемінде жәрдемақы алып келген. Атаулы әлеуметтік көмектің 6 айлығын қосып алғанда, есеп шотына 618 мың теңге қаржы түсіпті. Енді екінші жарты жылдықтың қаражатына қол жеткізсе, қорадағы мал басын көбейтуді жоспарлап отыр.
Арай Есенбек
