Биыл әлеуметтік төлемдерге 3,7 трлн теңге жұмсалды. Бұл туралы Еңбек және халықты әлеуметтік қорғау министрі Серік Шәпкенов айтты, деп хабарлайды inbusiness.kz.
Оның айтуынша, 2021 жылғы 1 қаңтардан бастап жасына байланысты зейнетақы мөлшері 7%, базалық зейнетақы мен мемлекеттік жәрдемақы мөлшері 5% өскен.
"Биыл республикалық бюджеттен зейнетақы, мемлекеттік жәрдемақы төлеуге, атаулы әлеуметтік көмек пен мемлекеттік әлеуметтік топтама беруге 5 млн адамға 3,7 трлн теңге берілді. Биыл 11 айда әлеуметтік тәуекелдер басталған кезде Мемлекеттік әлеуметтік сақтандыру қорынан 1,1 млн адамға 309 млрд теңге бөлінді", - деді Серік Шәпкенов.
Ол 11 айда 198,1 мың отбасы ( 988,8 мың адам) атаулы әлеуметтік көмекпен қамтылғанын атап өтті.
"Еңбекке қабілеттілердің 75% жұмыспен қамтылды. Олар жұмыспен қамтуға жәрдемдесу шараларына тартылды. АӘК алатын отбасылардан шыққан 514,5 мың бала кепілдік берілген әлеуметтік топтамалармен қамтамасыз етілді", - деді министр.
