Бұл туралы Ақпарат және қоғамдық даму министрлігінің Ақпарат комитетінің төрағасы Қанат Искаков Орталық коммуникациялар қызметінде өткен брифингте хабарлады, деп жазады inbusiness.kz.
"Біздің министрлік ақпараттық қолдау жүргізетін уәкілетті орган болғандықтан, әлеуметтік желілерге мониторинг бойынша жұмыс атқарылды. Мысалы, жастардың санасын улайтын, есірткі, психотроптық заттарды немесе суицидті насихаттайтын, балаларға зорлық-зомбылық көрсетуге қатысты контентті бұғаттау және оны шектеу бойынша жұмыс жүргізілді. Тек қана осы жылдың ішінде 6 мыңға жуық материал анықталды. Оның көбісі бұғатталды немесе шектелді", - деді спикер.
Оның сөзінше бұл жұмыс келесі жылы да өз жалғасын табады.
"Қазіргі таңда әлеуметтік желілерде балаларға қатысты зорлық-зомбылық әрекеттер көбейді. Оның салдары өкінішті жайттарға әкелуі мүмкін. Қазіргі таңда осы мәселені қолға алып, заң аясында ірі платформалармен (Facebook, YouTube, TikTok, Instagram) байланыс орнатылды. Осындай іс-әрекеттер анықталған жағдайда әлеуметтік желідегі парақшаны немесе қолданушыны бұғаттауға немесе шектеуге толық мүмкіндік бар. Бұл үлкен жетістік", - деп түйіндеді ведомство өкілі.
