Жасыл экономиканы қолдау және G-Global-ды дамыту коалициясының бас менеджері Асыл Окапованың айтуынша, былтыр қазаннан осы жылдың басына дейін конкурсқа өтініштер қабылданған.
"Жобаға 18-35 жас аралығында қазақстандықтар қатысты. Олар өз жұмысында БҰҰ-ның 5 тұрақты даму мақсатын қамтуы керек, яғни жобалар су, білім беру, таза энергия, қоқысты қайта өңдеу мәселелерін шешуге бағытталған. Осы уақытқа дейін 300-ден аса өтініш келіп түсті. Нәтижесінде, 40 жоба жартылай финалға өтті, комиссия ақтық сайысқа 10 жобаны іріктеп алды", – деді жобаның үйлестірушісі.
Сондай-ақ ол конкурстың жеңімпаздары арнайы грантқа ие болатынын жеткізді.
"Бүгін жеңімпаздарды анықтаймыз. Гранттың жалпы сомасы – 5 млн теңге. Жеңімпаздар бұл қаржыны өзара бөліп алады. Мысалы, былтыр бұл қаржыны 4 жеңімпаз бөліп алды", – деді Асыл Окапова.
Биыл комиссияның шешімімен төмендегі жобалар жеңіске жетті:
- "Қаржылық сауаттылықты дамыту платформасы" – Жанарыс Тубекбаев, 1 млн теңге;
- "Гидропоника әдісі арқылы қияр өсіру" – Жансүгір Серіков, 1,5 млн теңге;
- "Экотөсеме өндірісі" – Сания Аринова, 1 млн теңге;
- "Қазақ тіліндегі заманауи билердің онлайн курсы" – Аян Мухтасипов, 1,5 млн теңге.
Айта кетейік, "3.2.1.Старт!" жобасы 2016 жылдан бері ұйымдастырылып келеді. Осы уақытқа дейін 15 жеңімпаз анықталған. Олар өз жобаларын дамыту үшін ақшалай қолдауға ие болған.
