Министрлер кабинеті енді журналистермен тек кесте бойынша тілдеседі. Бұл мемлекеттік жұмыстың жаңа форматы.
Апта сайынғы отырыстарға тікелей есеп беретін министрлер ғана қатысады, деп хабарлады Үкіметте. Қалғандары онлайн отырыстарға қатысады.
Бұл жаңалық үкімет пулында жұмыс істейтін журналистердің мүмкіндіктерін айтарлықтай шектейді. Көптеген жылдар бойы "үкімет дәліздері" кез келген министрді "ұстап", оған сұрақ қоюға болатын жалғыз алаң болды. Енді журналистерде мұндай мүмкіндік жоқ. Барлық сұрақтар кесте бойынша ғана қойылады.
Кестеге сәйкес Премьер-Министрдің орынбасары – Қаржы министрі Ерұлан Жамаубаев айына бір рет қана брифинг өткізеді. Бұған дейін журналистер оны үкімет кулуарында тоқтатып, көкейтесті сауалдарын қоятын.
Бірақ, мәселен, Су шаруашылығы және суару министрі Нұржан Нұржігітов, Индустрия және құрылыс министрі Қанат Шарлапаев, Туризм және спорт министрі Ермек Маржықпаев қыркүйек пен қазан айларында бір-ақ рет журналистер алдына шығады.
Кестеде премьер-министрдің орынбасарларына қатысты ақпарат жарияланған жоқ. Премьер-министрдің өзіне қатысты да солай.
"Егер осы кестеге сәйкес брифинг өткізу кезеңінде ҚР Президенті жанындағы Орталық коммуникациялар қызметінің немесе ҚР Үкіметінің Баспасөз орталығы (Үкімет отырысының қорытындысы бойынша) алаңдарында орталық мемлекеттік органның бірінші басшысының жоспарланған баспасөз-конференциясы өтетін болса, онда жоғарыда көрсетілген кесте бойынша брифингті өткізбеуге болады", – деп хабарлады Үкіметтің Баспасөз орталығы.
Бірінші басшының шетелдік іссапарлары осы кесте бойынша брифинг өткізу кезеңімен сәйкес келген жағдайда бірінші басшының брифингі келесі аптаға ауыстырылады.
Орталық мемлекеттік органдар осы кесте бойынша брифинг өткізу алаңын өздері таңдауға құқылы.
"Орталық мемлекеттік органдардың баспасөз қызметі бұқаралық ақпарат құралдарын жоспарланған брифинг туралы оны өткізу уақытына кем дегенде екі күн қалғанға дейін хабардар етуі қажет", – деп жазылған хабарламада.
