Алматы облысы әкімінің бірінші орынбасары Қанат Есболатовтың мүгедектігі бар азаматтарға қатысты айтқан сөзі әлеуметтік желілерде үлкен сынға ұшырады, деп хабарлайды inbusiness.kz сайты.
Кездесу барысында Есболатов:
“Мүгедектерді сыйлайық, оларды онсыз да Алла жазалады”, – деп мәлімдеп, көпшілік арасында наразылық тудырды.
Қоғамдағы қызу талқылаудан кейін Қанат Есболатов әлеуметтік желідегі парақшасында жиындағы жағдайды түсіндірді. Оның айтуынша, кездесуге қалың жұрт жиналған, жиын төрт сағатқа созылған, ал сұрақ көп болғандықтан залда кезек ұзаққа созылған.
"Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын, – деді.
Ол өз сөзінің көпшіліктің көңіліне тигенін түсінетінін айтып, жұртшылықтан шынайы түрде кешірім сұрады. Сондай-ақ кез келген қоғамдық шарада мүмкіндігі шектеулі азаматтарға және егде жастағы адамдарға бірінші кезекте сөз беру керектігін атап өтті.
Алматы облысы әкімінің бірінші орынбасары халық көтерген мәселелердің барлығы хаттамаға енгізіліп, әкімдік пен министрлік тарапынан бақылауға алынғанын мәлімдеді.
