Алматы әкімі жұмыс сапарымен Жапонияда болып, мұндағы іскерлік орта өкілдерімен бірқатар екі жақты кездесу өткізді және Токио қаласының мэрі Юрико Койке ханымен жүздесті, деп хабарлайды strategy2050.kz.
Тараптар инвестициялық, сауда экономикалық салалар және қаланы одан әрі дамыту жөнінде ынтымақтастық мәселелерін талқылады. Токио мэрі Алматыда өткен дүниежүзілік қысқы Универсиаданың жоғары деңгейін ерекше атап өтті және Астанада болатын Халықаралық EXPO-2017 көрмесіне табыс тіледі.
"Мен Алматыда болғанмын, қала маған ерекше ұнады, оған деген сүйспеншілігім зор. Сіздің бұл сапарыңыз өзара ынтымақтастықты одан әрі нығайтуға жаңа серпіліс береді деген ойдамын", – дейді Ю.Койке.
"Tokyo Seiko MFG" компаниясы басқармасының төрағасы Шигето Танакамен болған кездесуде Алатау ауданындағы индустриялық аймақта орналасқан "Tokyo Rope Almaty" метиз зауытын салу жобасының екінші кезегін жүзеге асыру мәселелері талқыланды. "Tokyo Rope" компаниясының Алматыда болат өнімдерін шығарумен айналысатын алғашқы жапон зауыты өткен жылдың қараша айында президент Нұрсұлтан Назарбаевпен өткен телекөпір барысында Жапониядан іске қосылған еді.
Әлемдік рейтингте 10 үздік банк қатарына енген "The Bank of Tokyo-Mitsubishi UFG" басшылығымен кездесу барысында Бауыржан Байбек Алматыда біріккен жобаларды жүзеге асыруға ірі қаржы конглометрінің қолдайтындығына сенім білдірді.
Жол қозғалысын басқаратын Токио Орталығында болғаннан соң "Смарт сити" жобасы аясында Алматының даму Орталығы қала трафигін басқарудың осыған ұқсас орталығын құру үшін сараптамалық есеп жүргізеді. "Алматы су" холдингі "YYS International Pte" компаниясымен бірге су тазартудың коагулянтты гранул жүйесін жүзеге асырады.
Алматы делегациясы жұмыс сапары барысында сауда, инвестиция, қызмет көрсететін әлемдегі ең танымал корпорациялардың бірі "Mitsui&Co." офисінде болды, сонымен қатар "Shimizu" сейсмологиялық компаниясы зерттеу орталығының жұмысымен танысты.
