Алматы әуежайы қызметкерлеріне қатысты есірткі ісі бойынша тергеу басталды, деп хабарлайды Inbusiness.kz сайты ҚазТАГ агенттігіне сілтеме жасап.
"Ұлттық қауіпсіздік комитеті Алматы әуежайының қызметкерлеріне қатысты ҚР ҚК 297-баптың 3-бөлігінің 1 және 3-тармақтары (Есірткі құралдарын өткізу мақсатында заңсыз өндіру, қайта өңдеу, иемдену, сақтау, тасымалдау, жөнелту немесе өткізу) бойынша сотқа дейінгі тергеу жүргізіп жатыр", – деп жауап берді ҰҚК баспасөз қызметі агенттіктің сауалына.
ҰҚК Алматы халықаралық әуежайы әкімшілік департаменті басшысының орынбасары, түрік топ-менеджері Уфук Серттің ұсталғаны туралы ақпаратты растамады.
Айта кетсек, 28 желтоқсанда Алматы әуежайының түркиялық екі топ-менеджері аяқ астынан жұмыстан кеткенін жазғанбыз. 5 қаңтарда лауазымды тұлғаларға қатысты әуежайда ішкі тергеу жүріп жатқаны айтылды.
