Алматы маңында апатқа ұшыраған ұшақ бортында салмағы 603 кг жолжүгі болған, деп хабарлайды ҚазАқпарат.
"Оқиғаға қатысты айтарым: Bek Air әуе компаниясының рейсі Алматы-Нұр-Сұлтан №2100 бағыты бойынша жүзеге асырылды; ұшақ типі Foker-100; әуе кемесінің командирі Мұратбаев, екінші ұшқыш Молдағұлов, бортта 3 жолсерік болған. Бортта сондай-ақ 93 жолаушы болды. Оның 85-і – ересек, 5-еуі – үлкен бала, 3-еуі кішкентай сәби. Бортқа салмағы 603 кг жолжүгі, 613 кг жүк тиелген", – деді Болат Ержанов Алматыда өткен баспасөз мәслихатында.
Оның айтуынша, тіркеу жергілікті уақыт бойынша сағат 5.35-те басталған.
"Ұшақ 7.21-де ұша бастады, 7.25-те дабыл қағыла бастады. Ал 7.40-та әуе кемесінің радардан жоғалып кеткені жарияланды. Оқиға орнына бірінші болып әуежай қызметкерлері жетіп келді", – деді әуежай басшысы.
