Алматыдағы карантиндік шектеу салдарынан табысы азайған кәсіпкерлер мемлекет тарапынан қосымша қолдау сұрап отыр. Бұл туралы "Атамекен" ұлттық кәсіпкерлер палатасының "Фейсбуктегі" ресми парақшасында өткен онлайн-конференцияда қалалық палата директоры Нариман Әбілмашайықов айтты.
"Алматы қаласында карантин жарияланғалы бір апта болды. Осы аралықта жергілікті кәсіпкерлерден 8 мыңнан астам жүгінім түсті. Олардың сипатына қарап бірнеше топқа бөлуге болады. Алматылық кәсіпкерлерді алаңдатып отырған бірінші мәселе – екінші деңгейлі банктердің алдындағы несиелер мен берешектер мәселесі. Бізге келіп түскен сауалдың 35 пайызы осы мәселеге қатысты. Екінші мәселе – мемлекет алдындағы салықтық міндеттемелер. Ірі бизнес нысандары да, шағын бизнес те бұл тұрғыда қолдау күтіп отыр. Оның өзінде салықтық міндеттемелердің мерзімін шегерудің орнына каникул сұрап отыр. Үшінші мәселе сауда-ойын сауық орталықтарының жалға берушілері мен жалға алушылары арасындағы қатынастарға қатысты. Бұл нысандарда 240 мыңнан астам адам жұмыс істейді. Карантинге байланысты азық-түлік емес орталықтар жабылып жатыр. Техникалық қызмет көрсету, көлік жуу орындары кешеден бері жабылды. Олардан да көптеген өтініш, арыздар түсіп жатыр", – деді ол.
Құралай Құдайберген
