Алматының Бостандық ауданында көшеде пышақ ұстап жүрген ер адам ұсталды, деп хабарлайды inbusiness.kz сайты
Оқиға туралы ақпарат әлеуметтік желіде тарады. Желі қолданушысы белгісіз ер адамның қолына пышақ алып, көшеде еркін жүргенін жазды. Тұрғындардың айтуынша, ол айналадағы адамдардың қауіпсіздігіне қатер төндірген.
Алматы қаласы полиция департаментінің хабарлауынша, 30 тамызда "102" пультіне көшеде пышақ ұстап жүрген ер адам туралы хабарлама түскен. Оқиға орнына дереу полиция экипажы жіберілген.
"Оқиға орнына жеткен қызметкерлер ақпаратты растап, азаматтардың қауіпсіздігін қамтамасыз етті. Ер адам ұсталып, жедел медициналық жәрдем бригадасына тапсырылды. Оның Психикалық денсаулық орталығында есепте тұрғаны анықталып, кейін мамандандырылған медициналық мекемеге жатқызылды", – делінген хабарламада.
