Бұл туралы Алматы облысы әкімінің орынбасары Батыржан Байжұманов онлайн брифингте мәлім етті, деп хабарлайды inbusiness.kz.
Спикердің айтуынша, бұл жаңа оқу жылында барлық білім алып жатқандардың тек 1%-ы.
"Алматы облысында екі апталық карантинге 244 сынып жабылды. Бұл – 2800 бала, яғни, бұл білім алып жатқан сыныптардың 1%-ы. Жалпы статистикаға келер болсақ, өңірде 22 400 сынып болса, онда 442 000 оқушы білім алуда", – деді облыс әкімінің орынбасары.
Батыржан Байжұмановтың айтуынша, өңірде соңғы екі аптада коронавируспен ауырғандардың өсу қарқыны 0,9%-дан 0,6%-ға төмендеген.
"Облыс "қызыл" аймақта. Соңғы тәулікте індет жұқтырудың 218 жағдайы анықталды. Оның ішінде 35 бала бар. Ауруханаларға коронавирус инфекциясымен күнделікті 200-ге жуық адам түсуде. Ауырған адамдардың жас ерекшелігіне қарасақ, ең көбі - 50 және одан жоғары жастағылар, 43%. Одан кейін 30-49 жас аралығындағылар – 30%. 20-29 жас аралығындағылар – 17%, 14 жасқа дейінгі балалар - 14%", – деді әкімдік өкілі.
Құралай Құдайберген
