Алматы облысының Қарасай ауданында, Вечерняя тауының маңында, теңіз деңгейінен 3000 метрден астам биіктікте турист қыз тау соқпағынан адасып, қауіпсіз бағытпен өздігінен түсе алмаған. Көмекке шақырған қоңырау түн ортасында түскен, деп жазады inbusiness.kz сайты.
Оқиға туралы ақпарат алған ҚР ТЖМ "Барыс" республикалық құтқару қызметінің құтқарушылары іздеу-құтқару жұмыстары жүргізілетін аймаққа жедел аттанды.
Құтқарушылар бастапқыда берілген координаттарға барғанымен, турист қызды ол жерден таппады. Кейін онымен байланыс үзілген. Соған қарамастан, іздеу-құтқару жұмыстары шатқал бағыты бойынша жалғастырылды.
Іздеу барысында құтқарушылар турист қызды тауып алды. Оған медициналық көмек қажет болмады.
Құтқарушылар қызды таулы жермен алып өтіп, қауіпсіз аймаққа аман-есен жеткізді.
