Бүлдіршіннің туыстары жол-көлік оқиғасына кінәлі адам жауапкершіліктен құтылып кетуі мүмкін деп алаңдауда, деп хабарлайды inbusiness.kz сайты Tengrinews.kz сайтына сілтеме жасап.
Қайтыс болған баланың туысының айтуынша, қайғылы оқиға 10 мамырда күндізгі сағат 4-тер шамасында марқұм бала тұратын Саймасай ауылындағы үйдің маңында болған. Оқыс оқиғадан кейін бүлдіршін бірден көз жұмған. Алайда жол апатынан кейін әйелді ешкім ұстамады, дейді олар.
"Ол тіпті ата-анасына да келмеді, кешірім сұрамады. Ол кінәсін мойындамайды. Жол-көлік оқиғасынан кейін оны ешкім сараптамаға апарған жоқ. Қызметкерлер көліктегі қанды сүртіп тастаған, баланың аяқ киімдерін мүлдем басқа жаққа апарып қойған. Жол шетінде емес, жолда болғандай етіп сызып қойған", - деді қайтыс болған баланың тәтесі.
Олардың айтуынша, көлік жүргізген әйел мектепте мұғалім болып жұмыс істейді.
Алматы облысының Полиция департаменті 10 мамырда Саймасай ауылында адам өлімімен аяқталған жол-көлік оқиғасы болғанын растады.
"Opel Astra көлігінің жүргізушісі жолға жүгіріп шыққан баланы қағып кетті. Кәмелетке толмаған бала есін жимай, аурухананың жансақтау бөлімінде көз жұмды. Көлік жүргізушісі уақытша ұстау изоляторына қамалды", - деп хабарлады полиция.
Жол-көлік оқиғасына қатысты қылмыстық іс қозғалды. Қажетті сараптамалар тағайындалды.
