Арнайы мониторинг нәтижесінде Алматы облысында Ashyq жобасынан 997 кәсіпкерлік субъектісі шеттетілді, деп хабарлайды inbusiness.kz Алматы облыстық санитариялық-эпидемиологиялық бақылау департаментінің баспасөз қызметіне сілтеме жасап.
"Алматы облысында 8 933 нысан Ashyq жобасының қатысушысы. Мониторинг топ шағын және орта бизнестің 5 099 субъектісін тексеріп, қосымшаны дұрыс пайдаланбаған фактілерді анықтады. Соған сәйкес 997 жоба қатысушысы Ashyq жүйесінен шеттетілді", – деп жазылған хабарламада.
Цифрлық даму, инновациялар және аэроғарыш өнеркәсібі министрлігінің деректері бойынша, Алматы облысында 2021 жылғы 10 маусым мен 15 қыркүйек аралығындағында санитариялық-карантиндік режимді бұзған 3159 адам анықталды.
"Оның ішінде, "қызыл" мәртебесі бар 2 346 және "сары" мәртебесі бар 813 адам тіркелген. "Қызыл" мәртебесі бар тұлғаларға қатысты жалпы 3 894 175 теңге болатын 89 айыппұл салынды. Сондай-ақ "сары" мәртебе анықталған азаматтарға қатысты үй карантиніндегі шарттарды сақтау қажеттілігі туралы талаптармен 295 қаулы берілді", – деп жазылған хабарламада.
