Алматы облысында "дропперлік" әрекеті үшін жаңа Қылмыстық кодекстің 232-1-бабы бойынша алғаш рет сотқа дейінгі тергеп-тексеру басталды, деп хабарлайды inbusiness.kz сайты.
Әйел адам OLX сайтындағы "онлайн-төлемдер операторы" туралы жалған хабарландыруға алданып, өзінің банк картасын қылмыскерлерге пайдалануға берген.
Қыркүйек айынан бастап оның шотына 2 миллион теңгеден астам қаражат түскен. Әйел адам әрбір аударымнан 5 пайызын "комиссия" ретінде қалдырып отырған, ал қалған қаражат алаяқтардың есепшоттарына жіберілген.
Прокуратураның дерегіне сәйкес, бұл – алаяқтар жиі қолданатын схема. Олар ұрланған ақшаны қолма-қол ету үшін өз шоттарын пайдалануға дайын адамдарды іздейді. Енді заң мұндай "дропперлерге" де, олардың іс-әрекеттерін ұйымдастыратындарға да қатаң жаза белгілейді.
"Дропперлік" әрекет, яғни басқа тұлғалардың шоттарын қылмыстық мақсатта басқару үшін 7 жылға дейін бас бостандығынан айыру түріндегі қылмыстық жауаптылық қарастырылған.
