Алматы облысында биылғы жылы 12,9 млрд теңгеге денсаулық сақтау саласының 17 нысаны салынуда, 7 нысанның күрделі жөндеуіне 3,0 млрд теңге бөлінді. Бұл туралы ОКҚ алаңында өткен брифинг барысында Алматы облысының әкімі Амандық Баталов мәлім етті.
"COVID-19 індеті денсаулық сақтау саласы үшін үлкен сын болды, қабылданған шараларға қарамастан кадр жетіспеушілігі, құрал-жабдықтар жеткіліксіздігі әлі бар. Сондықтан жалпы пандемиямен күрес шараларына жергілікті бюджеттен 13,8 млрд теңге бөлінді, соның 8,8 млрд теңгесі екінші толқынына дайындыққа қарастырылды", – деді Амандық Баталов.
Оның айтуынша, Талдықорған қаласында қысқа мерзім ішінде 200 төсектік модульді инфекциялық аурухана салынды. Ол барлық қажетті заманауи құрал-жабдықтармен және штатпен қамтылды. Ал материалдық қолдау көрсету шеңберінде 5362 медицина қызметкеріне 4,7 млрд теңге көлемінде үстемақы төленді, 1123 медицина маманына жергілікті бюджеттен 137 млн теңге сыйақы берілген.
Құралай Құдайберген
