Алматы облысында 8 адам көлік апатынан мерт болды. Жантүршігерлік оқиғадан тек 36 жастағы әйел ғана аман қалған. Зардап шеккен әйел Қарағанды облысындағы Приозерск қаласының ауруханасына жеткізілген, деп хабарлайды ҚазАқпарат.
Жол-көлік апаты үш облыстың, демек, Қарағанды, Жамбыл, Алматы облысының жолдары түйіскен жерде болған. Нақтырақ айтқанда Алматы-Екатеринбург тас жолының 385 шақырымында, Жамбыл ауданына қарасты Үлкен ауылының маңында орын алған. Қайтыс болғандардың ішінде Астана қаласының тұрғындары да бар.
Опель және BMW маркалы көліктердің соқтығысуы салдарынан 8 адамның мерт болған оқиғанын облыстық ІІД баспасөз қызметі растады.
"20 тамыз күні жол-көлік оқиғасынан 8 адам мерт болғанын растаймыз. Аталған факті бойынша ҚР ҚК 345-бабы 4-бөлігі бойынша іс қозғалып, қажетті сот-медициналық сараптамалардың барлығы тағайындалды. Істі облыстық Анықтау басқармасының өзі жүргізеді", - деді аталған ведомствоның өкілі Көбейхан Нұрахмет.
8 адамның өмірі қиылған көлік апатынан соқтығысқан машинаның бірі өртеніп кеткен.
