Биыл 17 қаңтардан бастап Алматы облысында мамандандырылған халыққа қызмет көрсету орталықтары жұмысын қайта бастады, деп хабарлайды inbusiness.kz порталы "Азаматтарға арналған үкімет" мемлекеттік корпорациясына сілтеме жасап.
"Мамандандырылған ХҚКО-лар дүйсенбі-жұма аралығында таңғы сағат 9:00-ден кешкі сағат 18:00-ге дейін жұмыс істейді. Сенбі және жексенбі күндері жабық болады", – деп жазылған хабарламада.
Қаңтардың басында төтенше жағдайға байланысты Қазақстанда барлық мамандандырылған ХҚКО-ның жұмысы уақытша тоқтатылған еді.
12 қаңтарда Алматы, Алматы және Жамбыл облыстарын қоспағанда, елдің қалған өңірлерінде мамандандырылған орталықтар жұмысын бастаған.
14 қаңтарда Алматы қаласының мамандандырылған ХҚКО-лары жұмыс істей бастады.
"Бүгінде мамандандырылған ХҚКО-лар тек Жамбыл облысында жабық", – деп жазылған хабарламада.
"Азаматтарға арналған үкімет" корпорациясы Kaspi.kz және Homebank мобильді қосымшалары арқылы да көлікті онлайн режимде қайта рәсімдеуге болатынын еске салды.
