Алматы облысы Қарасай ауданында үйдегі өртті сөндіру кезінде қызметкер қаза тапты, деп хабарлайды inbusiness.kz сайты.
Алматы ТЖД ақпараты бойынша, 25 желтоқсан күні сағат 16:56-да Алматы ТЖД өрт сөндіру және авариялық-құтқару жұмыстары қызметінің №19 мамандандырылған өрт сөндіру бөлімінің өрт есептеулері Қарасай ауданындағы Көкөзек ауылына өртті сөндіруге шықты.
Қызметтік борышын атқару кезінде екі қабатты жеке үйдің шатырын шарпыған өртті сөндіру барысында 19-МӨСБ бөлімшесінің командирі азаматтық қорғау аға сержанты Уәли Әділет Аянұлы қаза тапты.
"Болған оқиғаның мән-жайы нақтылануда. Жергілікті жерде жедел-тергеу тобы жұмыс істеуде. ТЖМ Әділет Аянұлының туыстары мен жақындарына көңіл айтады. Ол сауатты тұлға, өз ісінің маманы ретінде жүрегімізде мәңгі қалады", – деп хабарлады ведомстводан.
