Алматы облысының аумағында жүргізілген "Профилактика" жедел алдын алу іс-шарасы барысында түнгі уақытта ойын-сауық орындарында немесе үйінен тыс жерде жүрген 155 бала анықталды, деп хабарлайды ҚазАқпарат.
"Профилактика" іс-шарасының негізгі мақсаты – алкогольдік мас күйде жасалатын немесе тұрмыстық заңбұзушылықтардың алдын алу, әсіресе жасөспірімдер арасындағы қылмыстарды болдырмау. "Облыс бойынша түнгі уақытта кәмелет жасына толмаған жасөспірімдердің заңсыз келуіне жол берген 7 көңіл көтеру орны анықталып, оларға хаттама толтырылды. Сондай-ақ, жедел алдын алу іс-шарасы кезінде тәртіп сақшылары 1244 әкімшілік заңбұзушылықты анықтап, жауапкершілікке тартты", – деп атап өтті облыстық жергілікті полиция қызметі басқармасының өкілі, полиция майоры Дәулет Смақов.
Айта кетейік, Алматы облысының полицейлері 23 - 27 қаңтар аралығында "Профилактика" жедел алдын алу іс-шарасы аясында өңірдегі қоғамдық орындардағы тәртіпке, әсіресе жасөспірімдердің әрекеттеріне жіті назар аударатын болады.
