Алматы облысындағы Левый Талғар шатқалында тауға жорыққа шыққан туристің үстіне тас құлап, ол ауыр жарақат алған, деп хабарлайды inbusiness.kz сайты.
Шатқалдың биіктігі 2 970 метрді құрайды. Оқиға орнына Алматы қаласы әкімдігінің Мониторинг және жедел әрекет ету орталығы мен "Барыс" республикалық құтқару қызметінің екі бақылау-құтқару бекетінің мамандары жіберілді.
Құтқарушылар зардап шеккен туристі тауып, алғашқы медициналық көмек көрсетті. Оның жағдайы ауыр деп бағаланған.
Мамандар туристі күрделі таулы жер бедері арқылы Кіші Талғар асуына қарай тасымалдаған. Жолда оларға Алматы қаласы альпинизм федерациясының еріктілері қосылды.
Бірлескен жұмыстың нәтижесінде зардап шеккен адам "Шымбұлақ" тау курортына жеткізіліп, Апаттар медицинасы орталығының бригадасына тапсырылды. Ол қалалық клиникалық ауруханаға жатқызылды.
