Қарулы күштердің "Шығыс" өңірлік қолбасшылығының әскери қызметшілері жолдарды тазартуға, қолайсыз ауа райынан жолда тұрып қалған жүргізушілер мен жолаушыларға көмек көрсетуге жұмылдырылды, деп жазады inbusiness.kz Қорғаныс министрлігінің баспасөз қызметіне сілтеме жасап.
Желдің күрт күшеюі және қатты боран салдары шығыс аймақтағы республикалық және жергілікті маңызы бар жолдарда қиындық туғызды.
Ведомство таратқан мәліметке сәйкес, ТЖМ аумақтық құтқару бөлімшесіне Аягөз гарнизонындағы танкистер құрамасы мен инженерлік-саперлік батальонның әскери қызметшілері көмекке келген көрінеді.
"Алматы-Өскемен" тас жолының 40 шақырымында броньды танк қызметінің бастығы майор Ержан Быжкеевтің басшылығымен әскери қызметшілер қар құрсауында қалған 50 адам мен 10 шақты көлікті арнайы техникамен эвакуациялады. Олардың бәрі Аягөз қаласына жеткізілді. Бүгінгі таңда құтқару жұмыстарына 5 әскери техника жұмылдырылды", - делінген хабарламада.
