Алматы тұрғындарын Қалқаман ауруханасының жанына қонған тікұшақ таңқалдырды, деп хабарлайды Tengrinews.kz.
Видео Instagram-дағы kris_p_almaty тобында жарияланған. "Аурухана жанына тікұшақ қонғанын осы уақытқа дейін көрген емеспін, осыған қарағанда дамып келе жатқан сияқтымыз", - деп жазады видео авторы.
Алматы қаласының денсаулық сақтау басқармасы бейне роликке түсініктеме берді.
"Бүгін сағат 11.46-да Жамбыл облысының Қордай кентіндегі орталық ауруханадан Алматы-Тараз республикалық тас жолда ЖКО-да зардап шеккен 3 адам Алматы қаласындағы №7 қалалық клиникалық ауруханаға тікұшақпен жеткізілді", - деп қалалық аурухана баспасөз-қызметі мәлім етті.
Алматы қаласындағы №4 ҚКА мен №7 ҚКА ауруханасының тікұшақ қонатын алаңдары бар. Бұлар Алматыда "Бүкіләлемдік Универсиада -2017"-ге дайындық кезінде салынған. Көбінесе мұнда тікұшақпен ЖКО салдарынан бас сүйек – ми зақымы мен сүйегі сынған адамдар жеткізіледі.
