Қаржы мониторингі агенттігінің Алматы қаласы бойынша аумақтық департаменті қомақты соманы қолма-қол ақшаға аударып келген қылмыстық топқа қатысты сотқа дейінгі тергеуді аяқтады, деп жазады inbusiness.kz.
Болат Қ., Қыстаубаев У. басқарған жеті адамнан тұратын топ материалдық сыйақы үшін жалған шот-фактуралар мен бастапқы есеп құжаттарын берумен айналысқан.
Тергеу барысында аталған тұлғалардың 2018-2020 жылдар аралығында коммерциялық ұйымдарға өздерінің бақылауындағы 4 компания арқылы жалған шот-фактуралар берген. Оның жалпы сомасы 3 млрд теңгені құрады.
Сотталушылардың тұрғылықты жерін тінту кезінде мөрлер, банк карталары, компьютерлер, ноутбуктер, бұрын қолма-қол ақшаға айналдырылған 7 млн теңге көлеміндегі қаражат табылып, тәркіленіп, жалпы салмағы 849 грамм заңсыз есірткі (марихуана) өсіру фактісі анықталды.
Сот үкімімен сотталушылар 1-бап бойынша кінәлі деп танылды. Қазақстан Республикасы Қылмыстық кодексінің 216-бабының 3-бөлігімен (жұмыстарды іс жүзінде орындамай, қызмет өрсетпей және тауарларды жөнелтпей шот-фактураны жазуға әрекет жасау) 3 жылдан 4,8 жылға дейін әртүрлі мерзімге бас бостандығынан айыру жазасы тағайындалды.
Есірткінің табылуы бойынша сотқа дейінгі тергеу жұмыстары Алматы қалалық полиция департаментіне берілді.
