Алматыда террорларға қарсы операцияның жүргізілуіне байланысты 19 қаңтар бірнеше аудандарында жол қозғалысы уақытша жабылады, деп хабарлайды inbusiness.kz.
Полиция департаменті қозғалыс шектелген аймақтарды атады. Олар:
- Абылай хан көшесінің бойымен Мақатаев көшесінен Бөгенбай батыр көшесіне дейін солтүстік және оңтүстік бағытта;
- Төле би даңғылы бойымен Желтоқсан көшесінен Назарбаев даңғылына дейін шығыс және батыс бағытта.
"Азаматтардан уақытша шараларға түсіністікпен қарауды, қозғалыс бағытын алдын ала реттеп, жол қозғалысы ережелерін қатаң сақтауды сұраймыз", – деп хабарлады Алматы қалалық полиция департаментінің баспасөз қызметі.
Еске сала кетсек, елімізде 19 қаңтар күні жергілікті уақыт бойынша сағат 00:00-де Төтенше жағдай режимі аяқталды.
Ол 5 қаңтарда енгізілген болатын. Төтенше жағдай сұйытылған газ бағасының қымбаттауына қарсы шерулерден басталған. Кейін оның арты жаппай тәртіпсіздікке ұласты.
Құралай Құдайберген
