Алматыда 200-ден астам қызметкері бар алты микроқаржы ұйымы анықталды. Олардың заңсыз әрекетінен 327 мыңнан астам адам зардап шекті, деп жазады inbusiness.kz сайты.
Қазақстан қаржылық мониторинг агенттігінің мәліметінше, қаржы ұйымының жұмысын шетелдік азаматтар бақылаған. Алтауы да бір құрылым ретінде жұмыс істеген. Бір кеңсені пайдаланған.
"Сот қарыз алушылардың 130 кепілдік шартын жарамсыз деп тану туралы талаптарын қанағаттандырды, осылайша азаматтар міндеттемелерден босатылды, ал микроқаржы ұйымдары алынған қаражатты қайтаруға міндеттелді", – делінген ресми хабарламада.
Қазіргі кезде Алматы қаласының прокуратурасы 327 мың азаматтың мүддесі үшін сотқа арыз түсірді. Ал қаржы нарығын реттеу және дамыту агенттігінің шешімімен екі компания микроқаржылық қызметті жүзеге асыру лицензиясынан айырылды, сондай-ақ тағы төрт аффилирленген микроқаржы ұйымына қатысты тексеріс жүргізіліп жатыр.
