Мәдениет және ақпарат министрлігінің қолдауымен ұйымдастырылған шараның бастамашысы – Жамбыл атындағы Қазақ мемлекеттік академиялық филармониясы.
Байқаудың басты мақсаты – Әміре Қашаубаевтың шығармашылық мұрасын насихаттау, дәстүрлі ән өнерінің дамуына үлес қосу және жас таланттарды қолдау. Сонымен қатар Біржан сал, Ақан сері, Естай мен Мұхит сынды халық композиторларының шығармаларын жаңғыртуға басымдық берілген.
Биыл байқауға 41 өтінім қабылданған. Іріктеуден өткен 20-35 жас аралығындағы 22 өнерпаз республикалық кезеңде бақ сынап жатыр. Қатысушылардың өнер көрсету реті жеребе арқылы белгіленді.
Байқау екі кезең бойынша өтеді. Алғашқы кезеңде әншілер вокалдық шеберлігін, өзіндік орындау мәнерін және дәстүрлі ән мектептерінің ерекшеліктерін меңгеру деңгейін көрсетеді.
Өнерпаздардың орындауын белгілі әншілер мен бейінді оқу орындарының оқытушыларынан құралған қазылар алқасы бағалайды. Қазылар құрамында Жақсыкелді Кемалов, Қайрат Кәкімов, Нұржан Жанпейісов, Шолпан Даржан және Гүлмира Сарина бар.
Байқау 27 қазанда қорытындыланады. Сағат 19:00-де жабылу салтанаты өтіп, үздік өнер көрсеткен қатысушылар марапатталады.
