Алматыда бизнесменнің кәмелетке толмаған қызын ұрлады деген күдікпен төрт адам ұсталды, деп хабарлайды 24.kz.
Алматы полиция департаменті қылмыстық полиция қызметкерлері бизнесменнің кәмелетке толмаған қызын ұрлап кетті деген күдікпен төрт адамды ұстады. Қаскүнемдер бизнесменнен қызы үшін жарты миллион АҚШ доллары мөлшерінде ақша талап еткен.
"Қылмыс 14 қараша күні күндіз қаладағы шағын аудандардың бірінің ауласында болған. Қылмыскерлер электрошокердің көмегімен жүргізушіні байлап, салонда отырған қызды ашықтан-ашық ұрлап кеткен. Артынша ата-анасына хабарласып, өтемақы талап еткен", - делінген хабарламада.
Қазіргі кезде тергеу органдары ұсталғандардың осы іске қатысын тексеріп жатыр. "Қыздың өмірі мен денсаулығына ешқандай қауіп-қатер төніп тұрған жоқ", - дейді ҚР ІІМ өкілдері.
