BI Group құрылыс компаниясы Алматыдағы Сәтбаев көшесінің бойындағы №2 автопарк аумағындағы құрылыс жобасын толығымен қайта қарайды. Бұл туралы Алматы әкімі Ерболат Досаев айтты хабарлайды inbusiness.kz.
"Шешім тұрғындардың тілектерін ескере отырып қабылданды", – деді ол бейсенбі күні Алматының Бостандық ауданының тұрғындарымен кездесуінде.
Жаңа жобаға мектеп, шағын емхана, балабақша, демалыс аймағы кіреді, деді өз кезегінде қала әкімінің орынбасары Мұхит Әзірбаев.
Сондай-ақ ол әкімдік Тұрғыт Озал көшесін – Сәтбаевтан Жандосовқа дейін жалғау бойынша жұмыс істеп жатқанын айтты. Қазір бұл көшелер бір-бірімен жалғаспайды.
Айта кетейік, ескі автопарк аумағына салынатын кешендердің іргесіндегі үйлердің тұрғындары құрылысты тоқтатып, саябақ салуды талап еткен еді.
