Бұл туралы Ерболат Досаев Әуезов ауданы тұрғындарымен кездесуінде айтты, деп хабарлайды inbusiness.kz.
"Сапалы әлеуметтік инфрақұрылыммен қамтамасыз ету әкімдіктің басты міндеті.
Қазіргі таңда аудандағы мектептерде 5 мыңнан астам орын жетіспейді. Мәселені шешу үшін Әуезов ауданында жаңа мектептер салынады", – деп атап өтті мегаполис әкімі.
Былтыр 1725 орындық №117 және 132 мектептерге 2 қосымша ғимарат пайдалануға берілді және "Достық" деп аталатын 1 жеке меншік мектеп ашылды.
Биыл "Жайлы мектеп" ұлттық жобасы аясында №97 мектеп ғимараты бұзылып, 600 орындық мектеп құрылысы басталады. Жыл соңына дейін 3,5 мыңнан астам оқушы оқитын 4 мектепте сейсмикалық күшейту мен күрделі жөндеу жұмыстары аяқталады.
Өткен жылы 348 орындық 6 жеке меншік балабақша ашылды. Биыл "Алтын бесік" шағын ауданында 120 орындық мемлекеттік балабақшаның құрылысы басталады.
