Алматының Алатау аудандық Халыққа қызмет көрсету орталығында ер адам көз жұмды. Бұл туралы "Азаматтарға арналған үкімет" мемлекеттік корпорациясы" ресми мәлімдеді.
"16 қаңтар күні Алматы қаласы Алатау аудандық ХҚКО-да 1964 жылы туған Жарас Нүркібайұлы Құнтақов есімді азаматтың қайтыс болғанын күйзеліспен хабарлаймыз. Жарас Нүркібайұлы ХҚКО-ға сағат 09:30-да "Тұрғылықты жері бойынша тіркелу" қызметіне жүгінген. Бұл уақытта ХҚКО-да адам көп болған жоқ. Жұбайы бланк толтырып жатқанда электрондық кезекке талон алып үлгермей-ақ сағат 09:42-де өзін жайсыз сезінген. Бұдан кейін оған ХҚКО-дағы кезекші медқызметкер шұғыл арада медициналық көмек көрсеткен. Сағат 09:52-де жедел жәрдем көлігі келіп жетті. Алайда ер адамды құтқару мүмкін болмады", – деп түсіндірген "Азаматтарға арналған үкімет" мемлекеттік корпорациясы" қайтыс болған азаматтың туған-туыстары мен жақындарына көңіл айтты.
"Азаматтарға арналған үкімет" мемлекеттік корпорациясы" созылмалы аурулармен сырқаттанған тұлғаларға қарбалас сәтте қызмет көрсету орталықтарына бармаған дұрыс" деп кеңес береді.
Айта кеткен жөн, ХҚКО-ларда мүмкіндігі шектеулі жандар мен жүкті әйелдер үшін жеңілдік терезелері жұмыс істрейді. Ал I және II топтағы мүгедектер ХҚКО қызметкерлерін 1414 нөмірі арқылы үйлеріне шақыруларына болады.
