Жыл басынан бері Алматы полицейлері иіс сынамаларының көмегімен 14 қылмыс ашқан. Бұл сынамалар шаһарда 1998 жылдан бастап жұмыс істейтін одорологиялық зертханада сақталып, зерттеледі, деп хабарлады ведомствоның баспасөз қызметі.
Одорология – криминалистиканың қылмыс орнынан иіс іздерін анықтау мен тәркілеуді қарастыратын бөлімі. Ал одорология – бұл иістер туралы ғылым.
"Қылмыс орындарынан біз иістерді алып, одорологиялық зертханаға жеткіземіз. Одоролог мамандар оқиға орнына Алматы қаласының ПД жедел-тергеу тобының құрамымен шығады. Алматы қаласының ПД ЖКБ зертханасы – Қазақстандағы ең тиімді зертханалардың бірі болып табылады. Зертхана ашылғалы бері көптеген ауыр және аса ауыр қылмыстардың ашылуына ықпал етті. Мысалы, 2020 жылдың бірінші жартыжылдығында мамандар 15 сынама өткізді, оның 14-і оң нәтиже берді", – деді Алматы қаласының ПД Жедел-криминалистикалық басқармасының аға криминалисі Натаван Алиева.
Маманның айтуынша, иіс іздері шыны ыдыста сақталады. Кейін осы сынамалармен кинологтар мен арнайы үйретілген иттер жұмыс істейді.
"Зерттеулер инспектор – кинолог және арнайы үйретілген ит – биодетектор қатысатын Алматы қаласының ПД Кинологиялық орталығының базасында жүзеге асырылады. Иттің иіс сезу қабілеті адамға қарағанда 700 есе артық. Зерттеулердің бұл түрі өзектілігін жоймайды, себебі адам кез-келген нысанмен түйіскен кезде оның жеке исі сол жерде міндетті түрде қалады", – деді Натаван Алиева.
