Алматы қаласының криминалдық полициясы жедел іс-шара барысында бұрын бірнеше рет ұрлық жасағаны үшін сотталған 3 азаматты ұстады, деп жазады inbusiness.kz сайты.
Қаскөйлер әртүрлі аудандарда автобустардағы жолаушылардың ақшасын, телефондары мен жеке заттарын жымқырып жүрген.
– Қалта ұрлығы мәселесі әлі де өзекті болып отыр. Әсіресе жаңа оқу жылының басталуымен жолаушылар саны артып, адамдар көп шоғырланатын орындарда қалта ұрыларының әрекет ету қаупі күшейеді. Әрбір ұсталған қылмыскер – ашылған қылмыс қана емес, сонымен қатар жаңа ұрлықтардың алдын алу. Біз "Заң және тәртіп" қағидасын дәйекті түрде жүзеге асырып, көше қылмысына қарсы жүйелі жұмысты жалғастырамыз, – деді Алматы қалалық ПД криминалдық полиция басқармасының бастығы Талант Исаев.
Алматы полициясы азаматтарды қоғамдық көлікте және адамдар көп жиналатын орындарда қырағы болуға шақырады: сөмке мен бағалы заттарды көзден таса қылмай, телефон мен әмиянды қараусыз қалдырмауға кеңес береді.
