Алматыда ұрлық жасады деген күдіктілер ұсталды, деп жазады inbusiness.kz inalmaty.kz сайтына сілтеме жасап.
Алматы полиция департаментінің баспасөз қызметі қаскүнемдердің қаланың түрлі аумағында жұмыс істегенін хабарлады. Олар адамдардың үйлеріне кіріп, құнды заттарын әкетіп отырған. "Қылмыстық дуэттің" 3 ұрлыққа қатысы бары анықталып отыр.
"Жеке сектордағы үйлердің бірінде автокөлікті ашып, ақша ұрлаған. Әуезов, Медеу және Бостандық аудандарында 3 ұрлық жасағаны дәлелденді. Ұсталғандардың бірінің автокөлігін тінту барысында 9 мм калибрлі Макаров жүйесінің жауынгерлік тапаншасы, 23 дана оқ-дәрі табылды", – деді Алматы полиция департаменті бастығының орынбасары Дидар Аханов.
Ұрылар соңғы рет қылмыс жасаған кезінде алтылық тұрғынның пәтерінен алтын бұйымдар мен ақша жоғалған. Ұсталғандар заттай айғақтардан құтылып үлгермеген.
Тәртіп сақшыларының айтуынша, күдіктілердің бірі 1983 жылы туған ер адам. Бұрын осындай қылмыстар жасағаны үшін сотталған. Ал сыбайласы 1991 жылғы, ол кісі өлтіргені үшін жазасын өтеген екен. Күдіктілер уақытша ұстау изоляторына қамалды. ҚР ҚК-нің 188-бабы 3-бөлігі (ұрлық) бойынша тергеу жүргізілуде.
