Алматы қаласының соты террорлық акт туралы жалған хабарлама жасаған ер адамға үкім шығарды, деп хабарлайды inbusiness.kz сайты.
Құқық бұзушы мас күйінде жедел қызметке қоңырау шалып, қаладағы сауда орталықтарының бірінде жарылыс болатыны туралы хабарлаған. Бұл ақпарат түскен бойда құқық қорғау органдары шұғыл әрекетке кірісіп, ғимараттан адамдарды эвакуациялап, нысанды толық тексерді. Тексеру барысында қоңыраудың жалған екені анықталды.
Осылайша, күдіктінің әрекеті төтенше жағдайлар қызметінің жұмысына кедергі келтіріп, материалдық шығын әкелді. Соттың шешімімен ол кінәлі деп танылып, 1 жылға бас бостандығынан айырылды.
"Мұндай жалған хабарламалар төтенше қызметтердің құнды ресурстарын ысырап етіп, олардың негізгі міндеттерін атқаруына кедергі жасайды. Сондай-ақ тұрғындар арасында негізсіз үрей туғызады. Террорлық акт туралы жалған ақпарат таратудың қылмыстық жауапкершілікке әкелетінін ескертеміз. Барша азаматты жауапкершілікке шақырамыз және мұндай әрекеттердің жазасыз қалмайтынын естен шығармауға кеңес береміз", - деді Алматы қалалық ПД экстремизмге қарсы күрес басқармасының бастығы Асхат Дәулетияров.
Құқық қорғау органдары қоғамның қауіпсіздігін қамтамасыз ету мақсатында осындай әрекеттерге қатаң түрде тосқауыл қойылатынын атап өтті.
