Алматыда коронавирустық инфекция бойынша сараптама жүргізетін зертханалар санын 8-ге жеткізу көзделген. Бұл туралы онлайн брифинг барысында шаһардың мемлекеттік Бас санитарлық дәрігері Жандарбек Бекшин мәлімдеді.
"Індетті анықтау бойынша қалада 10 мобильді жедел бригада жұмыс істейді. Сонымен қатар зертханалар санын көбейтуді жоспарлап отырмыз. Инфекция тарала бастаған кезде мегаполисте 2 зертхана болса, қазір 6 зертхана жұмыс істеуде. Болашақта олардың санын 8-ге жеткізуді жоспарлап отырмыз", – деді Жандарбек Бекшин.
Сонымен қатар ол шаһарда індет жұқтырғандардың 80%-ында ауру белгілері болмағанын айтты.
"Елімізде індет ошақтарын анықтау, тестілеу бойынша Алматы қаласы алда келеді. Мәселен мұнда полимеразды тізбекті реакция диагностикасы бойынша 54 мың тест тапсырылса, Нұр-Сұлтанда 41 мың тест тапсырылған", – деді Алматы қаласының мемлекеттік Бас санитарлық дәрігері.
Құралай Құдайберген
