Алматы облысының Қарасай ауданындағы Ақсай-19 саяжайындағы тасқын су зардаптары қалпына келтіріліп жатыр, деп хабарлайды 7kun.kz.
Осыдан бір ай бұрын 2 тәулік бойы толассыз жауған жауыннан Қырғауылды өзені арнасынан тасыды. 150 үйдің ауласына су кіріп, 5 тұрғын үй мен көпір пайдалануға жарамсыз болып қалды. Қазір өзеннің арнасы тазартылып, жергілікті тұрғындардың тіршілігі үшін қажетті жағдайлар рет-ретімен жасалып жатыр.
Ерболат Иманқұлов, Қарасай аудандық ТЖ бөлімінің бас маманы:
- Дәл қазір өзен табанын тереңдету мен ернеуін бекіту жұмыстары атқарылуда. Осы күнде жағдай қалпына келіп, өзендегі су деңгейі де қалыпты күйде.
Бақыт Нұрманов, мердігер мекеме директоры:
- Қазіргі таңда топографиялық негіздеме мен құрылыс-жобалау жұмыстары жүріп жатыр. Өзен арнасының 2,5 шақырымы бетонмен бекітілетін болады. Сонымен бірге автокөлікке арналған 4 көпір салынады. Жоғары жақтағы су реттегіш те қалпына келтіріледі.
