Дүниежүзілік қысқы Универсиада 2017 дерекциясы Қазақстан туристік қауымдастығымен бірге Универсиада нысандарында ақпараттық тур өткізіп жатыр, деп хабарлайды "ҚазАқпарат" ХАА.
Ақпараттық тур кезінде 13-14 желтоқсанда туристік агенттік өкілі сегіз спорт нысанына, нақтырақ айтқанда, Дүниежүзілік қысқы Универсиада жарыс аясында өтетін "Шымбұлақ" тау-шаңғы курорты, "Медеу" спорт кешені, "Сұңқар" халықаралық шаңғы-трамплин кешені, Балуан Шолақ атындағы Спорт және мәдениет сарайы, "Алатау" шаңғы және биатлон кешені, "Табаған" спорт-ойын-сауық кешені, "Алматы Арена", "Халық Арена" мұз сарайына барады.
"Универсиаданың өтуіне байланысты біздің қаламызға шетелдік туристермен қатар, еліміздің түкпір-түкпірінен қонақтар келеді. Осыған орай, туристік агенттіктер спорт нысандарын Алматы қаласы мен облысы бойынша жүргізілетін экскурсиялық турларға қосады. Қазірдің өзінде Универсиада нысандарын аралап шығуға арналған "Спорттық Алматы" экскурсиялық туры жасалды", – деді Қазақстан туристік қауымдастығының президенті Рашида Шайкенова.
Айта кетейік, 2017 жылғы 28-ші Дүниежүзілік қысқы Универсиада ойындары Алматы қаласында 29 қаңтар мен 8 ақпан аралығында өтеді. Универсиада бағдарламасына 12 спорт түрі енді: мəнерлеп сырғанау, шорт-трек, тау шаңғысы, шайбалы хоккей (ерлер, əйелдер), сноуборд, биатлон, шаңғы жарысы, керлинг, шаңғымен тұғырдан секіру, шаңғы қоссайысы, конькимен жүгіру, фристайл. Жарысқа 2 мыңға жуық спортшы қатысады. Универсиада барысында 3 мың ерікті жұмыс істемек. Оның ішіне шетелдік еріктілер де бар. 30 мың отандық жəне шетелдік турист келеді деп жоспарланған. Əлемнің 80 елінен 1 млрд адам жарыстарды телетрансляция арқылы көре алады.
