Оның айтуынша, жалған вакцина төлқұжатын, медициналық анықтамаларды қолдан жасау дерегін анықтау бойынша интернет-ресурстарға және БАҚ-қа мониторинг жүргізіліп жатыр.
"Жақында тұрғындарды Сауд Арабиясы Корольдігіне жіберу үшін 140-тан аса жалған вакцина төлқұжатын жасаумен айналысқан туристік компания анықталды. Сондай-ақ №21, №4, №16 және №13 қалалық емханалардың жалпы тәжірибе дәрігерлеріне қатысты қылмыстық іс тергеліп жатыр", - деді Нұрлан Алмасбеков "ZOOM-да" өткен арнайы жиналыста.
Аталған емханадағы дәрігерлер адамдарға коронавирусқа қарсы вакцина салмай, екпенің бірінші компонентін қабылдағаны туралы жалған деректерді базаға енгізген.
"Сондай-ақ егу бөлмесінде бейнебақылау камерасы болса, олар екпені алғандай етіп көрсетіп, екпе салынған орынды пластырмен жабыстырған. Бұл қызметтердің барлығына ақша берілгені анық", - деді қалалық полиция департаменті басшысының бірінші орынбасары.
Сонымен қатар ол жалған құжат жасағаны үшін 4 жылға дейін бас бостандығынан айыру жазасы барын, ал оны қолданған адам 40 тәулікке қамауға алынатынын ескертті.
