Алматыда "Қара риелторлар" ісі бойынша сот үкімі шықты, деп хабарлайды inbusiness.kz сайты Almaty.tv-ге сілтеме жасап.
Қылмыстық топтың құрамында 22 адам болған. Олардың ішінде психиатрлар, учаскелік полицейлер, риелторлар, нотариус өкілдері мен сот-медициналық сарапшылар бар. Күдіктілер психикалық ауытқулары бар және қарт адамдарды ұрлап, өлтіргені үшін айыпталды.
Қылмысқа барудағы негізгі мақсаты осы адамдардың мүлкін иемдену болған. Қылмыстық топты ұйымдастырған басты айыпталушы Ирина Гаппароваға 18 жыл берілді. Ал сыбайластарына – Әшірәлі Болтабоевқа 17 және Әуелхан Сатаевқа 16 жыл түрме жазасы тағайындалды. Басқа айыпталушыларға да үкім шығарылды.
"Айжан Жүсіпғалиеваны 6 жыл, Майра Оразаеваны 10 жыл, Газиз Ешмуратовты 3 жыл бас бостандығынан айыруға, сот-медициналық сарапшы Виталий Колесниковқа 4 жыл бас бостандығынан айыруға үкім шығарылды", – деді қылмыстық істер жөніндегі мамандандырылған ауданаралық соттың судьясы Ерлан Болатов.
