Биыл 1 шілдеде Оманнан Алматыға тікелей әуе рейсі ашылғаннан кейін шетелдік туристер саны күрт артты.
Бұл туралы мегаполис әкімдігі хабарлады.
"Алматы Таяу Шығыс елдерінен келген кәсіпкер туристер мен қарапайым саяхатшылар арасында үлкен танымалдылыққа ие бола бастады. Біз Оманнан келген қонақтарды құшақ жая қарсы аламыз, олардың сапары жағымды әрі есте қаларлық болатынына сенімдіміз. Қабылданған шаралардың арқасында Алматыға туристік дестинация ретінде қызығушылық артып келеді, біз бұл жұмысты жалғастырып жатырмыз", – деді Алматы қаласы туризм басқармасының басшысы Ғалия Тоқсейітова.
Ол "Алматы-Маскат" бағыты бойынша жаңа рейсті ашудың мақсаты Қазақстан мен Оманның туристік әлеуетін дамыту, екі елдің арасындағы сауда-экономикалық және мәдени байланыстарды нығайту екенін айтты.
Оның сөзінше, туризм басқармасы Алматы қаласын халықаралық нарықтарда белсенді түрде ілгерілетуде. Мысалы, Таяу Шығыс елдерінен туристерді тарту үшін Катар, БАӘ, Сауд Арабиясы және Оманның ірі қалалары бойынша роуд-шоу ұйымдастырылды.
Былтыр Алматы туризм басқармасының өкілдері Dubai – Arabian Travel Market 2022 көрмесіне қатысты.
Айта кетерлігі, пандемия аяқталған сәттен бастап Алматыда туристер көбейе бастады. 2022 жылы мегаполиске келген әрбір төртінші турист шетелдік болды. 2022 жылы Алматыда шетелдік туристер саны 417 мың адамға жетті. Биыл бірінші тоқсанда қалаға басқа елдерден 400 мыңнан астам турист келген.
Бүгінде Алматыдан әлемнің кез келген жеріне ұшуға болады. Ұшу кестесінде 23 елге рейс бар. Атап айтсақ, Ресей, Грузия, Оңтүстік Корея, БАӘ, Ұлыбритания және т.б. Шетелдің 38 қаласына тікелей рейстер ашылған.
