Алматыдағы JAS.BRANDS әзірлеген SAF Qymyz жобасы Нью-Йоркте өткен DIELINE Awards 2026 халықаралық сыйлығының алтын жүлдесін жеңіп алды, деп хабарлайды inbusiness.kz сайты.
Жоба алкогольсіз және әлсіз алкогольді сусындардың тұжырымдамалық дизайны санатында үздік деп танылып, әлемнің түкпір-түкпірінен ұсынылған 1500-ден астам жұмысты басып озды. Марапаттау рәсімі 6 мамыр күні LUXE PACK көрмесі аясында өтті.
SAF Qymyz – дәстүрлі қымызды заманауи үлгіде ұсынған жоба. Оның дизайны қазақтың кесесінен шабыт алып жасалған. Авторлар алюминий құтысын минималистік стильде әзірлеген. Ал "SAF" атауы қазақ тіліндегі "саф", яғни "таза" деген мағынаны білдіреді.
DIELINE Awards қаптама дизайны саласындағы әлемдегі беделді сыйлықтардың бірі саналады. Жоба жеңісі қазақстандық креатив индустриясының халықаралық деңгейде мойындалып жатқанын көрсетті.
