Алматы жылу желілеріне көрсеткен қызметтері үшін қарыз сомалары белгілі болды. Борышкерлер қатарында тұрғындар ғана емес, кәсіпорындар да бар, деп жазды inbusiness.kz.
2022 жылдың 1 қаңтарындағы жағдай бойынша қала тұрғындары мен кәсіпорындары мекемеге 1,196 млрд теңге қарыз. Бұл соманың басым бөлігін – 655 млн теңгені тұрғындар төлеуі тиіс. Заңды тұлғалардың қарызы 458 млн теңге.
"Өткен жылдың сәйкес кезеңімен салыстырғанда (1,610 млрд теңге) дебиторлық берешек 414 млн теңгеге немесе 25,7%-ға азайды. Өткен жылдың сәйкес кезеңімен салыстырғанда дебиторлық берешектің төмендеуі халық бойынша 148 млн теңгеге, заңды тұлғалар бойынша 275 млн теңгеге азайған. Сонымен бірге бюджеттік ұйымдардың дебиторлық берешегі 8 млн теңгеге өсті", – деп хабарлады "Алматы жылу желілері" АҚ баспасөз қызметі.
"Алматы жылу желілері" ЖШС-ның 2021 жылға арналған жылдық есебі бойынша, қарызын 2021 жылдың 15 сәуірі мен 31 қазаны аралығында төленген тұрғындардың айыппұлдары есептен шығарылған. Науқан барысында 1 121 тұтынушының (жеке тұлғалар – 747, заңды тұлғалар – 374) өтініштері қаралды.
