"Алатау жарық компаниясы" АҚ мәліметінше, 13 қараша күні ЖЭО-2 аймағында 110 кВ № 124А және № 101А электр желілерінің апатты ажыратылуы тіркелген. Оқиға салдарынан бірқатар ірі қосалқы станция – ПС-162А "Алғабас", ПС-169А "Ақбұлақ" және ПС-123А "АТЭЦ-2" уақытша тоқтан ажыратылды.
Апаттың кесірі Алатау ауданындағы тұтынушыларға тиді.
Электр қуаты Ақбұлақ, Алғабас, Ақкент, Саялы, Теректі, Ғажайып, Көксай, Нұркент, Дарабоз, Зерделі, сондай-ақ Райымбек даңғылы – Момышұлы – Мөңке би көшелері арасындағы аумақта өшіп қалды.
Оқиға орнына жедел түрде апаттық-қалпына келтіру бригадалары жіберіліп, мамандар апаттың себебін анықтауға және тоқ беру жүйесін қалпына келтіруге кіріскен.
"Алатау жарық компаниясы" 14 қараша, сағат 00:12–де ПС-169А "Ақбұлақ" қосалқы станциясы 110 кВ № 101А желісі арқылы қайта қосылғанын хабарлады.
"Қазіргі уақытта Нұркент, Ақкент, Алғабас, Теректі, Көксай шағынаудандарын электр энергиясымен қамту жұмыстары жалғасып жатыр. Ақбұлақ шағынауданында жартылай қосылды. Энергиямен жабдықтау толық қалпына келгенше апаттық-қалпына келтіру жұмыстары үздіксіз жүргізіледі", – деп хабарлады компания.
