"Алматы – шетсіз қала" тұжырымдамасын іске асыру бойынша онлайн-брифинг барысында Жоспарлау және урбанистика басқармасының басшысы Алмасхан Ахметжанов мегаполистегі дизайн-код тақырыбына тоқталды. Оның айтуынша бірнеше жылдан бері талқыланып келе жатқан бірыңғай талап бекітілмеген.
"Дизайн-код әлі бекітілген жоқ. Сондықтан әлі ұсыныстар мен ескертулер қабылдап жатырмыз. Оның ішінде кәсіпкерлердің пікіне назар аударудамыз. Қазіргі кезде жарнама компаниясынан ұсыныстар түсті. Мейрамханалар бойынша да дизайн-код енгізуді бастадық. Байқаған шығарсыздар, көптеген жазғы алаңдар біркелкі дизайнға сәйкес келе бастады. Оның барлығы кәсіпкерлер мен түрлі қауымдастық өкілдерінің қатысуымен жүзеге асты", – деді басқарма басшысы.
Жоспарлау және урбанистика басқармасы жыл соңына дейін ұсыныстардың барлығын қарастырмақ. Осылайша қала ғимараттарына қойылатын біркелкі талап тек келесі жылы бекітілмек.
"Дизайн-код келесі жылы бекітіледі деп ойлаймын. Бұл құжат сәулеттік шешімдер қабылдауда тұрақтылықты қамтамасыз етіп, бизнес пен алматылықтар үшін бір келкі талаптар қою үшін қажет. Байқаған шығарсыздар, әр 3-4 жыл сайын мегаполисте отыратын орындықтар мен шамдар ауысып тұрады. Дизайн-код мұның барлығын жүйелейді", – деді спикер.
Құралай Құдайберген
