Алматының мониторингтік топтары демалыс күндері бірқатар көпшілік іс-шаралардың өткізілуін тоқтатты, деп хабарлады әкімдіктің баспасөз қызметі.
Алматыда карантин шараларының сақталуын бақылау бойынша тексеру шаралары жалғасуда. Басты міндет – коронавирус инфекциясының таралу қаупін азайтуға бағытталған санитарлық-эпидемиялық талаптардың сақталуын қамтамасыз ету. Оның құрамына аудан әкімдіктерінің, жергілікті полиция қызметінің, Тауарлар сапасы мен қауіпсіздігін бақылау басқармаларының, кәсіпкерлер палатасының мамандары кіреді. 26 мониторингтік топ күнделікті тексеру іс-шараларын жүргізуде.
Ағымдағы жылдың 17 қазан күні сағат 20:51-де Медеу ауданының мониторингтік тобы Қазақстан қонақүйінің Ball room залында (жертөле қабаты) үйлену тойы өткізіліп жатқанын анықтап, жолын кесті. Оған 80-ге жуық адам жиналған. Барлығы ғимараттан шығарылып, тиісті шаралар қабылданды. Іс-шара қонақтарына Алматы қаласының Бас мемлекеттік санитар дәрігерінің қаулы нормалары жеткізілді.
Сонымен қатар ағымдағы жылдың 17 қазанында Әуезов ауданында сағат 17.05 -те мобильді топ Ақсай 3, 14а мекенжайында орналасқан "Інжу" мейрамханасында көпшіліктің қатысуымен өтіп жатқан шараны (құдалық) анықтады. Бірінші қабатта 40 адамға, екінші қабатта-50 адамға арнап той өткізілген. Сағат 17.45-те рейдтің мобильді тобы Шамгон Қажығалиева 15 мекенжайы бойынша орналасқан "Аделлина" мейрамханасында 50 адамға арналған құдалықты тоқтатты. Ұйымдастырушыларға түсіндіру жұмыстары жүргізіліп, ҚР Әкімшілік құқық бұзушылық туралы Кодексінің 425-бабы бойынша хаттамалар толтырылды.
Жалпы биылғы 8-16 қазан аралығында мониторингтік топтар 1300-ден астам нысанды тексерді. Оның ішінде 314-інде заңбұзушылықтар анықталды. Алматы қаласы БМСД 15.08.2020 жылғы №56 қаулысының бұзылуының арасында жұмысына уақытша тыйым салынған кәсіпкерлік объектілерінің қызметі (түнгі клубтар, караоке, букмекер кеңселері, компьютерлік клубтар, бильярд клубтары), сондай-ақ адамдар көп жиналатын салтанатты, отбасылық іс-шараларды (үйлену тойлары, мерейтойлар, банкеттер) өткізу. Сонымен қатар, санитарлық-эпидемиялық талаптардың бұзылуына байланысты жеке тұлғаларға қатысты 35 әкімшілік хаттама толтырылды.
